Монгол Ардын журамт цэрэг Хиагтыг чөлөөлсний дараа буюу 1921 оны 3 дугаар сарын 24-нд хуралдсан анхдугаар хурлаас Д.Сүхбаатарын санаачлагаар ардын журамт цэргийн хувцас хэрэглэлийг сэлбэн засах, анхны соёмбот туг оёх ажилд цэргийн ар гэрийн хүмүүсийг татан оролцуулж оёдлын бүлгэм байгуулжээ.

1922 оны эхээр манай улс байнгын армитай болж цэрэг, дарга нарыг жигд хувцас хэрэглэлээр хангах шаардлагын үүднээс “Бэлтгэн үйлдэх тасаг” нэртэй цэргийн гар үйлдвэрийг албан ёсоор байгуулснаар үйлдвэрийн үндэс суурь тавигдсан түүхтэй. 1947 онд тус үйлдвэр үүсэн байгуулагдсаны 25 жилийн ойгоор “Хөдөлмөрийн гавьяаны улаан тугийн одон”-гоор шагнагдаж, төр нийгмийн нэрт зүтгэлтэн С.Янжмаагийн нэрэмжит болсон юм.

1962 онд үйлдвэрийн байр шинэчлэгдэн одоогийн байранд шилжин орж, Монгол Улсын хүчний бүх байгууллагуудыг дүрэмт хувцас хэрэглэлээр хангах ажлыг нэр төртэй биелүүлж байгаа бөгөөд түүхэнд тод мөрөө үлдээсэн 100 жилийн түүхэн замналтай төрийн өмчит аж ахуйн тооцоот үйлдвэрийн газар юм.